Да Міжнароднага дня роднай мовы Салігорская раённая дзіцячая бібліятэка падрыхтавала мерапрыемства «Гучы, маё роднае слова!». Удзельнікамі сталі дзеці, бацькі і педагогі ДУА «Яслі-сад №1 УСР і ЖКГ ААТ «Беларуськалій».
Супрацоўнікі прапанавалі наведвальнікам экскурсію па бібліятэцы і музеі лялек. Падрыхтавалі віктарыну «Па старонках беларускіх казак», гутарку «Спяшайцеся прачытаць!», падарожжа «Вандроўка па Беларусі». Дарослыя і дзеці з задавальненнем удзельнічалі ў літаратурнай гульні «Не проста ў словы я гуляю, на роднай мове размаўляю». Гуртом перакладалі рускія словы на беларускую мову.
Да мерапрыемства былі аформлены кніжныя выставы: «Тут кнігі радуюць сяброў», «Фёдар Гурыновіч – пісьменнік роднага краю» і іншыя.